Thursday, November 26, 2009

မှာချင်တယ် ၀င်းကြည်မရယ် (၂)

ဒီလိုနှင့် ၀င်းကြည်မတယောက် အမေ့နှင့် ရွာဦးကျောင်းဆရာတော်ကို ကန်တော့ကာ ရန်ကုန် ရွှေမြို့တော်ကြီးဆီသို့ ရောက်ခဲ့ပေပြီ။ မြို့ရောက်စ အချိန်တုန်းကဆို မျက်စိကို အနားပေးရသည် မရှိ။ အရာအားလုံးက ကြည့်ချင်စရာတွေ၊ မမြင်ဘူးတာတွေချည်း။

မြို့ရွှေမမတို့ရဲ့ ၀တ်စားထားတဲ့ ပုံစံတွေကို ငေးမိ၊ အားကျမိရင်း . . . ၊ ၀င်းကြည်မ ကိုယ့်ကိုယ်ကို သတိထားမိ လိုက်၏။ မိမိ ၀တ်စားထားသည်များက ဆံပင်က ဘီးစပတ်၊ (၀င်းကြည်မ က ရွာမှာဆို ဆံပင် အရှည်ဆုံး၊ အမေကဆို “ငါ့သမီး ဆံပင်က သိပ်ကောင်းတာ၊ လုံးဝ မဖြတ်ပစ်နဲ့နော်” ဟု မြို့တက်ခါနီး မှာလိုက်သေးသည်။) မျက်နှာမှာက သနပ်ခါးဘဲကြား၊ အင်္ကျီက ရင်ဖုန်း၊ ထမီကြည့်ပြန်တော့ နွေတုန်းက ကိုရင်သာအေးတို့ ရှင်ပြုပွဲမှာ ကွမ်းထောင်ကိုင်ရင်း ၀တ်ဖို့အတွက် ချုပ်ထားတဲ့ ချိပ်ထမီ။

ဒါကြောင့် ဖြစ်မှာ ၊ မြို့ရွှေမမတို့က ၀င်းကြည်မကို ကွက်ကြည့် ကွက်ကြည့်လုပ်ပြီး ရယ်သွားကြ၏။ အစကတော့ “ငါလှလို့ ကြည့်တာနေမှာ” ဟု မိမိကိုယ်ကိုယ်ကို မိမိ အထင်ကြီးမိသော်လည်း သေသေချာချာ ကြည့်လိုက်တော့မှ မိမိရဲ့ “တိုက်ဂေါ” ပုံစံကို ရိပ်မိသွားကာ မိမိ လုပ်ရမည့် အလုပ်တိုက်ဆီသို့သာ စိတ်က ရောက်နှင့်နေတော့သည်။ တဆက်တည်းမှာပင် “နေနှင့်အုံးပေါ့ မြို့ရွှေသူတွေရယ် . . .။ ငါလည်း ညီးတို့လို မြို့ရွှေသူ ဖြစ်တော့မှာပါ။ နောက်မှ ညီးတို့နဲ့ငါ ဘယ်သူနိုင်မလဲဆိုတာ အလှချင်းပြိုင်ကြတာပေါ့ ” ဟု စိတ်ထဲမှ ကြုံးဝါးလိုက်မိ၏။

ဒီလိုနှင့် နာရီလက်တံများက ၀ါးမြိုသွားခဲ့၍ တနှစ်တာကာလ အချိန်တွေ ကုန်ဆုံး သွားခဲ့ပေပြီ။ ကိုရင်ပညာသာမိတို့ စာမေးပွဲများလည်း ဖြေဆိုမှု ပြီးဆုံးခဲ့ပေပြီ။ ကျောင်းပိတ်ရက်အတွင်း ရွာမှာ အပန်းဖြေလို့ ကလေးတွေအတွက် ယဉ်ကျေးမှုတွေ သင်ရင်းဖြင့် အချိန်ကုန်ဆုံးဖို့ စာအုပ်တွေသိမ်းကာ အထုပ်တွေ ပြင်ဆင်ရတော့၏။ အထုပ်တွေပြင်ရင်းဖြင့် ၀င်းကြည်မကို သတိရလိုက်မိ၏။

“ အင်း . . . ဘာလိုလိုနဲ့ ၀င်းကြည်မ မြို့ကို ရောက်တာ တနှစ်တောင် ပြည့်တော့မှာပါလား။ ခုချိန်ဆို ၀င်းကြည်မလည်း နေသားကျလောက်ပြီ၊ အလုပ်အကိုင်ရော အဆင်ပြေလားမသိ။ အင်း . . . မနက်ဖြန်ဆို တနင်္ဂနွေနေ့ပဲ။ ၀င်းကြည်မတို့ အလုပ်ပိတ်မယ် ထင်တယ်။ ရွာကို စာလေးဘာလေးရေးဖို့နဲ့ မှာချင်တာများ မှာလို့ရအောင် ကြွအုံးမှပဲ” ဟု ကိုရင်ပညာသာမိ စိတ်ကူးမိလိုက်၏။

တနင်္ဂနွေနေ့ မွန်းတည့် (၁၂)နာရီခန့် ဆွမ်းစားပြီးသောအချိန်၌ ကျောင်းထိုင်ဆရာတော်ကို ခွင့်ပန်၍ ဘုန်းကြီးဆေးပင် မသုံးဆောင်တော့ဘဲ (စားပြီးတရေး ဘုန်းကြီးဆေးဟု အမျိုးသမီးတဦး ပြောဖူးသည်။ စကားချပ်။) ၀င်းကြည်မတို့ ရှိရာ အလုပ်တိုက်ဆီသို့ ကိုရင် ပညာသာမိ ကြွလာခဲ့၏။

အလုပ်တိုက်ဆီသို့ အရောက် . . . .

အပိုင်း (၃) ဆက်လက်ရေးသားပါမည်။

မောင်ပညာ (မန်းတက္ကသိုလ်)
http://pyinyarzarni.blogspot.com/

No comments:

Post a Comment

Myanmar Student Monks Organization in Thailand. Powered by Blogger.