Tuesday, December 1, 2009

မှာချင်တယ် ၀င်းကြည်မရယ် (၃)

အလုပ်တိုက်ဆီသို့ အရောက် ခြံစောင့် ဒကာကြီးအားခွင့်ပန်၍ အထဲသို့ရောက်သည်နှင့် အလုပ်ရှင်အား ၀င်းကြည်မနှင့် တွေ့လိုကြောင်း ပြောလိုက်ရာ ၀င်းကြည်မ ရှိရာ အဆောင်သို့ သေသေချာချာ လိုက်ပို့ပေး၏။

ဧည့်ခန်းမတွင် ခေတ္တခဏ စောင့်ဆိုင်းပြီးနောက် ၀င်းကြည်မ ထွက်လာကာ ကိုရင် ပညာသာမိကို ရိုသေစွာ ကန်တော့၏။ ကိုရင် ပညာသာမိကား ၀င်းကြည်မကို မမှတ်မိ။

“ဒကာမလေး၊ ၀င်းကြည်မ မရှိဘူးလား”ဟု မေးလိုက်မိ၏။

ဝင်းကြည်ကြည်မလည်း လှိုက်လှိုက်လှဲလှဲ ရယ်လျက်
“ကိုရင် သာမိ ရယ်၊ တပည့်တော်မကိုတောင် မမှတ်မိတော့ဘူးလား” ဟုဆိုတော့မှ ၀င်းကြည်မမှန်း သိရတော့၏။

သြော် “ တစ်နှစ်တာ ကာလရဲ့ ပြောင်းလဲမှုပေပဲ”ဟု ကိုရင် ပညာသာမိ တွေးလိုက်မိ၏။


ထို့နောက်
“၀င်းကြည်မရယ်၊ နင့် ဆံပင်တွေ ဘယ်ရောက်သွားလို့ ဘိုဆံတောက် ဖြစ်နေရတာလဲ။ နောက်ပြီး နင်က သနပ်ခါး မလိမ်းဘဲ နှုတ်ခမ်းနီ ပါးနီတွေနဲ့ဆိုတော့ ငါတောင် မမှတ်မိတော့ဘူး။ ရွာက နင့်အမေနဲ့ ရွာသူ ရွာသားတွေလည်း မှတ်မိမယ် မထင်တော့ဘူ”။
“ကိုရင်ကလည်း သိရဲ့သားနဲ့ ။ မြို့မှာနေတော့လည်း မြို့စတိုင်လ်ပေါ့။ တောစတိုင်လ်နဲ့ နေလို့ ဘယ်ဖြစ်ပါ့မလဲ။ တပည့်တော်တို့ ငယ်ငယ်က ရွာဦးကျောင်းဆရာတော်ဆီမှာ သင်ခဲ့ရဖူးတဲ့ “ကာလံ ဒေသံ” ပေါ့။ အခြေအနေနဲ့ အချိန်အခါ အရပဲလေ။ မဟုတ်ဘူးလား ကိုရင်” ဟု ၀င်းကြည်မက ပြုံးလျက် ကိုရင် ပညာသာမိကို မေးခွန်းထုတ်လိုက်၏။

“ ဟုတ်တော့ ဟုတ်ပါတယ်ဟာ။ ဒါပေမယ့် နင်ပြောတဲ့ ကာလံ ဒေသံ ဆိုတာက ဒါက မြန်မာပြည်လေ။ နိုင်ငံခြားမှ မဟုတ်တာ။ မြန်မာပြည်မှာတောင် ဒီလိုဖြစ်နေရင် နိုင်ငံခြားရောက်ရင် နင် ဘယ်လိုဖြစ်မလဲ။ ငါတို့တတွေရဲ့ သားသမီးတာဝန် ၀တ္တရားတွေထဲမှာ မွေခံထိုက်စေ ဆိုတာ ပါတယ်။ အဲဒါ မိဘရဲ့ ပစ္စည်းဥစ္စာ အမွေကိုတင် ပြောတာမဟုတ်ဘူး။ ရိုးရာယဉ်ကျေးမှု အမွေကို ခံယူထိန်းသိမ်းရမယ်လို့ပြောတာ။

နောက်တခု စဉ်းစာကြည့်ရင် နင် နိုင်ငံခြားကို ရောက်ပြီဆိုပါတော့ ပတ်ဝန်းကျင် အနေအထားအရ မြန်မာထမီ၊ သနပ်ခါးတွေကို မ၀တ်နိုင်ဘူး၊ မလိမ်နိုင်ဘူး ထားပါတော့၊ ကိုယ့် အိမ်ရောက်တဲ့ အချိန်မှာ မြန်မာထမိန် မ၀တ်သင့်ဘူးလား။ သနပ်ခါးရော လိမ်လို့ မရနိုင်ဘူးလား။ ဘုန်းကြီး ရဟန်းသံဃာတွေနဲ့ တွေ့တဲ့အခါ ဒူးပေါ် ပေါင်ပေါ်တွေနဲ့ (ဓမ္မဂါရ၀) တရားအရိုအသေရော ဖြစ်ပါ့မလား။ နင်က ခု မြန်မာပြည်မှာပဲ ရှိပါသေးတယ်ဟာ။ အခြေအနေနဲ့ အချိန်အခါကို ငါနားလည်ပါတယ်။ ရိုးရာ အမွေ ယဉ်ကျေးမှုတွေ ပျောက်ကုန်မှာ စိုးလို့ပါ။

နင် သတိရအုံးမှာပေါ့။ ငယ်ငယ်တုန်းက နင် အော် အော်ပြီးတော့ ဆိုနေတဲ့ သီချင်းလေ။ ငါတောင်မှ နင် ဆိုလွန်းအားကြီးလို့ မှတ်မိနေသေးတယ်။ ဘာတဲ့ . . .

“ထမင်းစားတိုင်း အစဉ်သတိရပါ။ ဆန်ဆိုသည်မှာ ရွာမှာနေတုန်း ငါတို့က စိုက်တဲ့ စပါးက ဖြစ်တယ်။ ဘို ဆံတောက်ညှပ်တော့ ပြန်သတိရပါ။ ရွာအလှူမှာဆို ကေသာမင်ပိတုန်း အားလုံးငေးတဲ့ အပျိုချောလေးရယ်၊ နောက်ပြီး ဘာတဲ့ . . . . ဘို သီချင်းရွတ်တော့ ပြန်သတိရပါ။ ဆရာတော်ကိုယ်တိုင် သင်ကာ အံ ဖတ် ၀တ်တက် အသင်းရဲ့ အတော်ဆုံး ညီမရယ်” ဆိုတာလေ။

ခုတော့ နင်က သတိမေ့နေပြီကိုး။ ပြီးတော့ ဘ၀ပါ မေ့တော့မှာ။ နင်နဲ့ ငါက ငယ်သူငယ်ချင်းတွေလေ။ ပြီးတော့ ခုနေ အချိန်မှာ ငါက ဘာသာရေးခေါင်းဆောင် ဖြစ်နေပြီ။ ပြောသင့်တယ် ထင်တာကို ငါတော့ ဆက်ပြောရမှာပဲ။

နင် သတိထား စဉ်းစားရမှာက “နင် ဘယ်သူလဲ။ နင် ဘာလူမျိုးလဲ။ နင် ဘယ်ကလဲ။ နင် ဘယ်ကို သွားလို့ ဘယ်ကို ပြန်မှာလဲ” ဆိုတာပဲ။

နင်က ရန်ကုန်ရွှေမြို့တော်ကို ရောက်ပြီး လခတွေကောင်းလို့၊ အစားအသောက်တွေ ပေါလို့၊ နေရာ ထိုင်ခင်းတွေ ကောင်းလို့ နင့်ဘ၀ ဘယ်လောက်ကြီးပဲ မြင့်မားနေ မြင့်မားနေ၊ နင်က ဒီဘ၀မှာတော့ ၀င်းကြည်မက ၀င်းကြည်မပဲ။ နင့်ရဲ့ ဒီ ဘ၀ ဒီ ခန္ဓာ၊ နင့်ရဲ့ မွေးတဲ့ အမေနဲ့ ကျွေးခဲ့တဲ့ အဖေ။ ပညာသင်ပေးခဲ့ဖူးတဲ့ ဆရာသမား၊ အရွယ်ရောက် လူလားမြောက်အောင် နေထိုင်ခွင့် ပေးခဲ့တဲ့ မွေးရပ်ဇာတိ၊ ပညာသင်ဖက် ဆော့ဖော် ဆော့ဖက် သူငယ်ချင်းတွေ၊ ဒါတွေကို နင် မေ့သွားပြီးလား။ မေ့ ပစ်ဖို့ မကြိုးစားသင့်ဘူး။ မေ့ပစ်ဖို့လည်း မသင့်တော်ဘူးဆိုတာ နင် သတိရသင့်၊ စဉ်းစားသင့်တယ်။

ရွာဦးကျောင်း ဆရာတော် ငါတို့ကို သင်ပေးခဲ့ဖူးတဲ့ ဘယ်လိုမှ မမေ့ကောင်းတဲ့ အရာတွေထဲမှာ မွေးရပ်ဇာတိ ပါတယ်။ နောက်ပြီး နင်မြို့တက်ခါနီး ဆရာတော် ဆုံးမလိုက်တဲ့ စကားကို နင်မေ့သွားပြီလား။ ဆီးသီးသည် မဗျိုင်း မဖြစ်စေနဲ့ ဆိုတာလေ။ ဒီထက် ပို အရေးကြီးတာက နင်က သူများ မဟုတ်ဘူး။ နင့် အမေကို လုပ်ကျွေးရမယ့် တာဝန် နင့်မှာ အပြည့်ရှိတယ်။ နင့်အဖေ ကွယ်လွန်သွားတာတောင် အရွယ်ရှိရဲ့သားနဲ့ အိမ်ထောင်မပြုဘဲ အရွယ်ရောက် လူလားမြောက်အောင် နင့် ကျွေးမွေး ပြုစုခဲ့တာ။ ပညာတွေ သင်ပေးခဲ့တာတွေကို နင် မေ့ပစ်တော့မှာလား။

အပိုင်း (၄) ဆက်လက် ရေးသားပါမည်။

မောင်ပညာ (မန်းတက္ကသိုလ်)
http://pyinyarzarni.blogspot.com/

No comments:

Post a Comment

Myanmar Student Monks Organization in Thailand. Powered by Blogger.