Sunday, January 17, 2010

ကိုယ်မှာ မတတ် စာမှာတတ် ဂါဟတ်ကိုက်တတ်သည်

ဒီခေါင်းစဉ်လေးကို အားလုံးကြားဖူးကြလိမ့်မယ်ထင်ပါတယ်၊ “ကိုယ်မှာ မတတ် စာမှာတတ် ဂါဟတ် ကိုက်တတ်သည်” တဲ့၊ ကိုယ်တတ်သိထားတဲ့ ပညာကို နှလုံးသားထဲ ဦးနှောက်ထဲ ရောက်အောင် (apply) မလုပ် အသုံးမချဘဲ တတ်သိထားတဲ့ စာအပေါ်မှာပဲ ရပ်တန့်နေမယ်ဆိုယင် ဂါဟတ် အကိုက်ခံရမယ် လို့ဆိုလိုပါတယ်၊

ဂါဟတ်ဆိုတာ ဘယ်လို အကောင်ကြီးလဲလို့ မေးစရာရှိလာပြန်ပါတယ်၊ ဂေါ်ဇီလာလို အမွှေးမဲမဲ အစွယ်ပြူးပြူးကြီးလား၊ ဒိုင်နိုဆောလို ခြေလေးချောင်းနဲ့ အမြီးရှည်ရှည် အကောင်ကြီးလားပေါ့၊ တကယ်တော့ ဂါဟတ် ဆိုတာ သက်ရှိသတ္တ၀ါမဟုတ်ပါဘူး၊ အကိုက်ခံရမယ်ဆိုတာကလည်း တင်စားထားတာပါ၊

ကျနော် ၂၀၀၀-ခုနှစ်က သာသနာ့တက္ကသိုလ်(ရန်ကုန်) ၀င်ခွင့်စာမေးပွဲဖြေတော့ တိုက်တိုက်ဆိုင်ဆိုင် အထက်က ခေါင်းစဉ်နဲ့ မေးခွန်းတစ်ပုဒ်ပါခဲ့ပါတယ်၊ “ကိုယ်မှာမတတ် စာမှာတတ် ဂါဟတ် ကိုက်တတ်သည် ဆိုတာ ဘာကိုဆိုလိုပါသလဲ၊ အဓိပ္ပါယ်ရှင်းပြပါ”တဲ့၊

စာစကားနဲ့ ပြောရယင် ဂါဟသုံးမျိုးရှိပါတယ်၊ တဏှာဂါဟ၊ မာနဂါဟ၊ ဒိဋ္ဌိဂါဟပေါ့၊ ဒီတရား သုံးပါးက နိမ့်ကျပြီး ယုတ်နိမ့်တဲ့ ဘ၀တွေကို ဆွဲချတတ်ပါတယ်၊ ကိုယ်အောင်ထားတဲ့ စာမေးပွဲတွေ (certificates) အောင်လက်မှတ်တွေအပေါ်မှာ ငြိကပ်တွယ်တာတဲ့တဏှာ (Clinging)၊ ကိုယ်ဘယ်လိုနည်းနဲ့ပဲဖြစ်ဖြစ် အောင်ထားတဲ့ ရရှိထားတဲ့ အောင်လက်မှတ်တွေအတွက် ငါတကောကောပြီး ကိုယ်လို မအောင်တဲ့သူတွေတွေ့တဲ့အခါ (အသက်အရွယ် ဂုဏ်သိက္ခာအားဖြင့်ကြီးသူတွေကိုပင် တွေ့ကြုံဆက်ဆံရတဲ့အခါ) ငါလောက် မသိဘူး၊ ငါလောက် မတတ်ဘူးဆိုတဲ့ မာန (Pride)၊ ကိုယ်တတ်ထားတဲ့ သညာသိအပေါ် အဓိမာနတွေလွန်ကဲပြီး လွဲမှားတဲ့ အယူအဆ အတွေးအခေါ်တွေကို မသိမသာပဲဖြစ်ဖြစ် သိသိသာသာပဲဖြစ်ဖြစ် ဆုပ်ကိုင်လာတတ်တဲ့ ဒိဋ္ဌိ (False belief)၊ ဒီတရားတွေဟာ စာမှာသာတတ်ပြီး ကိုယ်မှာ မတတ်သူကို ကိုက်ဖြတ်ပါလိမ့်မယ်၊

ဒစ်ကာဗာရီ (Discovery Channel) တွေကို ကြည့်ဖြစ်တဲ့အခါ ခြင်္သေ့တွေ ကျားတွေက သူတို့ရဲ့ သားကောင်တွေကို အရှင်လတ်လတ် ကိုက်ဖြတ်စားသောက်ကြတာ စာဖတ်သူတို့ တွေ့ဖူးကြမှာပါ၊ သွေးသံရဲရဲနဲ့ အောက်ကသတ္တ၀ါ မချိမဆံ့ခံစားရတဲ့ပုံရိပ်ကို လူတိုင်း အသဲထိတ်ကြပါတယ်၊ တဏှာ၊ မာန၊ ဒိဋ္ဌိဆိုတဲ့ ဒီတရားသုံးပါးဟာလည်း ကိုယ်မှာ မတတ်ဘဲ စာမှာသာတတ်နေတဲ့သူကို ကိုက်ဖြတ်စားသောက်ကြပါလိမ့်မယ်၊

ဒီတရားသုံးပါးဟာ သံသရာဝဲသြဃထဲမှာ မကျွတ်မလွတ်နိုင်အောင် ဆွဲထားတတ်တဲ့အတွက် ပပဉ္စတရားလို့လည်း ခေါ်ပါတယ်၊ ကိုယ်တတ်သိထားတဲ့ စာမေးပွဲတွေ အောင်လက်မှတ်တွေဆိုတဲ့ အပေါ်ယံအကာတွေပေါ်မှာပဲ ရပ်တန့်မနေဘဲ သင်ထား တတ်ထားတဲ့အသိတွေကို အခြေခံပြီး လောကကောင်းကျိုး လူသားကောင်းကျိုးကို ဆောင်ရွင်နိုင်စေဖို့ စာဖတ်သူတွေကို ဆုတောင်းလိုက်ပါတယ်။

မှတ်ချက်- သာဂေါင်ရဲ့ ပညာမာန အကြောင်းမေးမြန်းချက်ကိုတွေ့မိ၍ ဤစာကို ရေးလိုက်မိပါသည်။

အသျှင်အဂ္ဂ

No comments:

Post a Comment

Myanmar Student Monks Organization in Thailand. Powered by Blogger.