Friday, January 15, 2010

ဟေတီနိုင်ငံသားများနှင့် ကုလ၀န်းထမ်းများအတွက် ၀မ်းနည်းကြောင်း သ၀ဏ်လွှာ

ကျနော်တို့ ( မြန်မာ)နိုင်ငံဟာ ၂၀၀၈ မေလက တိုက်ခတ်ခဲ့သည့် နာဂစ်မုန်တိုင်း သာဘာဝဘေးဒဏ်ကြောင့်အသက်ပေါင်းသိန်းချီသေကျေခဲ့ကြရပါသည်။အသက်မဲ့ရုပ်ဝတ္ထုများစွာပျက်စီးဆုံရှုံးခဲ့ကြရပါသည်။ အထူးသဖြင့် စိတ်ရောဂါဝေဒနာဒုက္ခသည် များစွာ ကျန်ရစ်ခဲ့ကြပါသည်။
မဆည်နိုင်တဲ့ မျက်ရည်တွေနဲ့ အတူ အထီးကျန်ဆန်စွာ မှုန်းဝါးဝါးမြင်ကွင်းတွေကြားမှာ ထမင်းတစ်လုပ် ရေတစ်မှုန့်အတွက် ကယ်မယ့်သူတွေကို မျှော်လင့်စောင့်စားခဲ့ကြရပါသည်။ ယခုတိုင်အောင် ကိုယ်တိုင်ကြုံတွေ့သူများက မျက်နှာငယ်ဘ၀နှင့်အသံတိတ်ကြေကွဲ ငိုကြွေးနေကြဆဲပင်ဖြစ်ပါသည်။ ကမ္ဘာ့မိသားစုများနှင့် အတူအားထားရှုရှိုက်ခဲ့သောလေသည်ပင် ကျနော်တို့ကို ဘေးသင့်စေခဲ့ပြီ။

ထိုအချိန်က ကိုယ်တွေ့ကြုံတွေ့သူ ကျန်ရစ်သူ မိသားစုများရော ၊ ဆက်နွယ်ပတ်သက်သူ ကရုဏာ မေတ္တာရှင်ကမ္ဘာ့မိသားစုများပါ ၀မ်းနည်းပူဆွေးမှုများတွေနှင့်အတူ ကိုယ်စီဆိုင်ရာ ထုံးတမ်းအစဉ်အလာအရ စိတ်ဓာတ်အား(Spiritual Power) ဖြင့် ဆုတောင်း၊ အမျှအတမ်း ပေးဝေခဲ့ကြပါတယ်။ မေတ္တာ ပို့ပေးခဲ့ကြပါတယ်။ ကျနော်တို့ သံဃာတော်များကလည်း ကိုယ်အားရော၊ စိတ်အားပါ သွားရောက်လှူဒါန်း ကူညီခဲ့ကြပါသည်။

ကျနော်တို့လိုထပ်တူထပ်မျှ စာနာသနားကြတဲ့ ဤကမ္ဘာမြေပေါ်( အင်္ဂါဂြိုလ်နှင့် လကမ္ဘာမပါ :P) အတူနေထိုင်ကြတဲ့ အခြားကမ္ဘာ့မိသားစုဝင်တွေများကပို့ပေးသော မေတ္တာ၊ကရုဏာတိုကို ကျနော်တို့က ၀မ်းသာပီတိမျက်ရည်ဖြင့် မမြင်နိုင်တဲ့ သ၀ဏ်လွှာဖြင့် တုံ့ပြန်ခဲ့ကြပါသည်။ လှိုက်လှိုက်လှဲလှဲ ၀မ်းမြောက်ကြည်နုး၍ မကြားနိုင်သောစကားလုံးဖြင့် ကျေးဇူးတင်ခဲ့ကြပါသည်။ ကျနော်တို့နိုင်ငံဆီကို ကိုယ်တိုင်လာရောက်၍ သုံးဆောင်စရာပစ္စည်းများဖြင့် (Material Power) ကိုယ်အားဖြင့် အကူအညီပေးခဲ့ကြပါသည်။

ဆက်လက်၍ ယခုအခါ ဇန်န၀ါရီ ၁၂ ရက်၊ ညနေ ၅ နာရီအချိန်တွင် လှုပ်ခတ်ခဲ့သော ငလျင်ကြောင့် ဟေတီနိုင်ငံ၊ ပို့အော်ပရင့်တစ်မြို့လုံးပျက်စီးသွားခဲ့ပါသည်။ အသက်ပေါင်းများစွာ ဆုံးရှုံးခဲ့ကြပါသည်။ ကျနော်တို့ကမ္ဘာ့မိသားစု အတူမှီခိုရပ်တည်ရာ မြေကြီးသည်ပင် ဟေတီနိုင်ငံသားတို့ကို ဘေးသင့်စေခဲ့ပြီ။


ဟေတီနိုင်သားများသည် ကျနော်တို့၏တစ်အူထုံးဆင်း ညီအကိုရင်းများပမာ၊ မဟာပထ၀ီမြေကြီးပေါ်တွင်မွေးချင်းတူများဖြစ်သည်ဟု (မာတာယထာ နိယံပုတ္တ၊ မာယုသာ ဧကပုတ္တ မာနုရက္ခေ) မှတ်ယူပါသည်။ ကျနော်တို့လည်း ကမ္ဘာမြေပေါ်မှာမွေးဖွားတဲ့ လူသားတစ်ယောက်ဖြစ်၍ ကမ္ဘာ့ရေထု၊ လေထုကို အတူသောက်သုံးစွဲသူမိသားစုတွင် ကျနော်တို့လည်းပါဝင်ကြပါသည်။ ကမ္ဘာ့မိသားစု (Global-Family)တွင် ကျနော်တို့်လဲ လူသားစိတ်ရှိသော (မနုဿတ္တဘာဝ-Humanity) လူသားဖြစ်သည့်အတွက် မိသားစုဝင်တစ်ယောက် ဒုက္ခရောက်နေခြင်းသည် မိသားစုဝင်တိုင်းတွင် တာဝန်မကင်းဟုမှတ်ယူကြပါသည်။
ကမ္ဘာကြီးကျန်မာရေးမကောင်းလျှင် ကျနော်တို့်လည်း အိပ်မပျော်နိုင်ခဲ့ကြပါ။ ဥပမာအားဖြင့် ကမ္ဘာ့လေထုကို အတူသုံးစွဲကြတဲ့အတွက် ငှက်တုပ်ကွေးကူးစက်ရောဂါကြောင့် တစ်ကမ္ဘာ(အိမ်)လုံးနှင့်သက်ဆိုင်နေသဖြင့်အိပ်မရခဲ့ခြင်းဖြစ်ပါသည်။ကျနော်တို့(မြန်မာနိုင်ငံ)အိမ်တွင်ပင် မာစ်(Mask) မလောက်ငှ၍ ပြဿနာဖြစ်ခဲ့ရပါသည်။ ကျနော်တို့ကလည်း ၀မ်းနည်းကြေကွဲမှုတွေနှင့်အတူ ကွယ်လွန်သွားခဲ့ကြသော ဟေတီ နိုင်ငံသူ နိုင်ငံသားအားလုံးလုံးတို့အား အမျှအတမ်း ပေးဝေလိုက်ပါသည်။ ရောက်ရာဘုံဘ၀က ဝေသောအမျှကို သာဓုခေါ်ဆိုနိုင်ကြပါစေ။
ကျန်ရစ်သူမိသားစုများလည်း စိတ်ဆင်းရဲခြင်းဒုက္ခဘေး၊ သောကဘေးမှ ကင်းဝေးစေရန် မေတ္တာပို့သပေးလိုက်ပါသည်။ ကွယ်လွန်သွားကြသော ဟေတီမိသာစုဝင်များနှင့် ကုလ၀န်ထမ်းများအတွက် ကျန်ရစ်သူမိသားစုများနှင့်ထပ်တူထပ်မျှ ပူဆွေးသောကဖြစ်ပါကြောင်း ထိုင်းနိုင်ငံရောက် ကျနော်တို့ကျောင်းသားရဟန်းတော်များကလည်း ဟေတီးနိုင်ငံသူ နိုင်ငံသားများနှင့် ကုလအဖွဲ့ဝင်အပေါင်းသို့ ၀မ်းနည်းကြောင်းသ၀ဏ်လွှာပေးပို့ပါကြောင်း


ရည်ညွန်းချက်။ ။
ကျနော်တို့၏ ဆရာဗုဒ္ဓက မေတ္တသုတ်တွင် (ဘာသာမခွဲခြား)သတ္တ၀ါအားလုံးတို့အပေါ်တွင် ကျင့်ကြံဖို့ ဟောပြောထားခဲ့ပါသည်။

၁။ယေကေစိ ပါဏဘူတတ္ထိ၊ သတာ ၀ါ ထာဝရာဝ န၀သေသာ။
ဒီဃာ ၀ါ ယေ၀ အဒိဋ္ဌာ ၊ ယေ၀ ဒူရေ ၀သန္တိ အ၀ိဒူရေ။

၂။မာတာယထာ နိယံပုတ္တ ၊ မာယုသာ ဧကပုတ္တမာနုရက္ခေ။
ဧ၀မ္ပိ သဗ္ဗဘူတေသု၊ မာနသံ ဘာဝယေ အပရိမာနံ။

၃။ဒုက္ခပတ္တာ စ နိဒုက္ခာ ၊ ဘယပတ္တာ စ နိဗ္ဘယာ။
သောကပတ္တာစ နိသောကာ၊ ဟောန္တု သဗ္ဗေပိ ပါဏိနော။

No comments:

Post a Comment

Myanmar Student Monks Organization in Thailand. Powered by Blogger.