Thursday, February 4, 2010

မေတ္တာတွေ ပေးမယ်

လောဘ ကိုယ့်အတွက်၊ ရည်ရွယ် လျက်၊ သူ့အတွက် အကျိုးထင်။
မေတ္တာသူ့တွက်၊ ရည်ရွယ် လျက်၊ ကိုယ့်အတွက် အကျိုးထင်။

ဒီကဗျာ-ကို စာရေးသူတို့ ငယ်ဆရာဖြစ်သည့် အင်းစိန်ရွာမပရိယတ္တိစာသင်တိုက်ဆရာတော် အရှင်တိလောကာဘိဝံသ က သူ၏တပည့် ဒကာ ဒကာမများအား မကြာခဏ တိုက်တွန်းလေ့ရှိ၊ သြ၀ါဒပေး ဆုံးမလေ့ရှိတဲ့ ကဗျာလေးပါ။
စာရေးသူတို့နှင့် တရင်းတနှီး အကျွမ်းဝင်နေသော ကဗျာဟု ဆိုက မှားအံ့မည် မထင်။
ကဗျာလေးက တိုတောင်းလှပေမယ့် ရည်ရွယ်ချက်က တိုတို ကျဉ်းကျဉ်းနဲ့ လိုရင်း မိတယ်။ တိကျ ပေါ်လွင်တယ်။
လူသားဆိုတာကလည်း ပျော်ရွှင်ဖို့ ငြိမ်းချမ်းဖို့ အမြဲတမ်း အလိုရှိနေတာ မဟုတ်လား။ အဲဒီအတွက် အသုံးအဆောင် ပစ္စည်းများကို မိမိရဲ့ စိတ်နဲ့ကိုယ် အတွက် ဖျော်ဖြေစရာ ဇိမ်ခံပစ္စည်းအဖြစ် ရှာဖွေ ၀ယ်ယူသုံးဆောင်ကြရပြန်တယ်။

တခါတလေ ကိုယ့်အတွက် ရှာထားတဲ့ ပစ္စည်းတွေက ကိုယ့်အတွက် သုံးဆောင်ရသည်က နည်းနည်း သူ့အတွက် ဂရုစိုက် နေရတာက ခပ်များများရယ်။

ကား ဒုက္ခ မခံစားနိုင်လို့

ဥပမာ ကိုယ်စီးဖို့ ၀ယ်ထားသည့် ကားတစ်စီး ဆိုပါတော့။ သူ့အပေါ်မှာ ကိုယ်က စီးဖို့။ သက်တောင့်သက်သာ ရှိစေဖို့။ ခရီးသွား လွယ်ကူစေဖို့။ အချိန်တွေ မနှောင်းစေဖို့- စသည်ဖြင့် မိမိအတွက် ၀ယ်ထားသည့် ကား။
သို့သော် ကိုယ့်အတွက် သူတာဝန်ယူ ဆောင်ရွက်ပေးတာက နည်းနည်းရယ်။ အဲဒီကားထားဖို့။ ရေဆေးဖို့၊ ဆီထည့်ဖို့၊ ပြင်ဆင်စရာ ရှိတာတွေ ပြင်ဖို့ ဆင်ဖို့၊ ကားနေရာထားဖို့၊ လူခိုးမှာ စိုးသည့်အတွက် သေသေချာချာ သိမ်းဆည်းဖို့ သူ့ကို ဂရုစိုက် တာဝန်ယူ ဆောင်ရွက်ပေးနေသည်က ခပ်များများရယ်။
အဲ့ဒါကြောင့် ချမ်းသာတဲ့ နိုင်ငံတွေမှာ ကားဒုက္ခကို မခံစားနိုင်လို့ လိုင်းကားပဲ စီးကြတယ်ဆိုလားပဲ။

ကိုယ့်အတွက် ရည်ရွယ်သော်လည်း

ပြောချင်တာက ကိုယ့်အတွက် ရည်ရွယ်ပြီး ရှာထားရတဲ့ ပစ္စည်းဖြစ်ပေမယ့် သူ့အတွက်နဲ့ ကိုယ်က ဂရုစိုက် စောင့်ရှောက်နေရသည့် အချိန် ပူပန်ကြောင့်ကြနေရသည့် အချိန်က အများသားရယ်။ စိတ်ချမ်းသာမှုက နည်းနည်း သူနဲ့ ပတ်သက်လို့ စိတ်ဆင်းရဲနေရသည့် အချိန်က များပါဘိတော့။
ဒီလိုဆိုတော့ ကိုယ့်အတွက် ရယူပိုင်ဆိုင်နေရပေမယ့် သူ့အတွက်ပဲ စိတ်မချမ်းမသာနဲ့ ပူပင် ကြောင့်ကြ စိုးရိမ်သောက ဖြစ်နေရ၊ ရောက်နေရတယ် ဆိုပါတော့။ ကိုယ်အတွက် ရည်ရွယ်ပေမယ့် ကိုယ့်အတွက် မဟုတ်ဘဲ သူ့အတွက် ဖြစ်နေရတာပါပဲလား။

လူတိုင်း လုပ်သင့်တာပေါ့
မေတ္တာကတော့ ကိုယ့်အတွက် မဟုတ်ပါဘူး။ သူ့အတွက် ပေးတာပါ။ ကိုယ် သုံးဆောင် ခံစားဖို့ မဟုတ်ရပါဘူး။ သူ သုံးဆောင်ခံစားနိုင်ဖို့၊ သူ စိတ်ချမ်းသာစေနိုင်ဖို့ ရည်ရွယ်တာပါ။ ဒါပေမယ့် ကိုယ်က ပေးလိုက်တာက နည်းနည်း ပြန်ရလာက အများကြီးရယ်။
အဲဒါကြောင့် -
တနေ့ သုံးခါ၊ အိုးတစ်ရာဖြင့်၊ ချက်ကာထမင်း၊ ပေးလှူခြင်းထက်၊ မယွင်းစင်စစ်၊ နို့တညစ်စာ၊ မေတ္တာပွားများ၊ ကျိုးကြီးမားသည်၊ ဘုရားမြတ်စွာ၊ မိန့်ခွန်းတည်း - လို့ ဆရာတော်ဘုရားကြီးများ ရေးစပ်သီကုံးခဲ့ကြတာဖြစ်တယ်။
တနေ့သုံးခါ အိုးတစ်ရာ ဆိုတော့ တနေ့ ထမင်းအိုးပေါင်း သုံးရာပေါ့။ အဲဒီ ထမင်းအိုးတွေနဲ့ ဘယ်လိုပင် အပင်ပန်းခံ၊ ဘယ်လိုပင် ဖွယ်ဖွယ်ရာရာတွေနဲ့ ချက်ပြုတ်ပြီးတော့ ဘယ်သူ့ကို မဆို ဘယ်လိုပင် ကျွေးမွေးကျွေးမွေး နွားမကို နို့ညှစ်တဲ့အခါ ကိုင်ပြီးတော့ အောက်ကိုဆွဲချတဲ့ တိုတောင်းလှတဲ့ အချိန်အတိုင်းအတာအတွင်း မေတ္တာပွားနေသူ၊ ပို့နေသူလောက် အကျိုးကျေးဇူး မများနိုင်ဘူးလို့ မြတ်ဗုဒ္ဓက အတိအကျ ဟောထားခဲ့တာ။ သူ့အတွက် ရည်ရွယ်ပေမယ့် ရလာတာက ကိုယ့်အတွက်ချည်းပဲနော်။
အဲဒီလောက်တောင် အရင်းအနှီးမများဘဲ အကျိုးကျေးဇူးတွေက အတိုင်းအတာ မရှိလောက်အောင် များနေတော့ လူတိုင်း လုပ်သင့်တာပေါ့နော်။
မေတ္တာအတွက် ရည်ရွယ်ချက်

အဲဒါဆိုတော့ မေတ္တာပို့တဲ့ ရည်ရွယ်ချက်လေးတော့ သိသင့်တာပေါ့နော် . . . ။

ဘေးရန်အန္တရာယ်၊ အသွယ်သွယ်၊ ကွယ်ပစေလိုတာ။
ကောင်းကျိုးမှန်သမျှ၊ အပြည့်ဝ၊ ရစေချင်ကြတာ။
မေတ္တာအတွက၊် ရည်ရွယ်ချက၊် နှစ်ချက်မှတ်ကြပါ။

မေတ္တာပို့တဲ့ ရည်ရွယ်ချက် က အချက် နှစ်ချက်တည်းရယ်။ ပေးပို့လိုက်တဲ့ မေတ္တာက ဘေးရန် အန္တရာယ်တွေ မကျ မရောက် ကင်းပျောက်စေဖို့နဲ့၊ လိုအပ်ရာရာ ကောင်းကျိုးသုခ မှန်သမျှတို့ ရစေဖို့ ဒီနှစ်ချက်တည်းပါပဲ။
တွေ့ပြီ တွေ့ပြီ သူပဲ သူပဲ
အဲဒီရည်ရွယ်ချက် နှစ်ရပ်နဲ့ မေတ္တာပို့ကြပြီ ဆိုပါတော့။ အရှေ့ အရပ် စသည်ဖြင့် အရပ်လေးမျက်နှာ၊ အရပ် ရှစ်မျက်နှာ အတိုင်းအတာ ပမာဏမရှိလောက်တဲ့ အနန္တဒေသတွေကို အာရုံပြု ပွားများနိုင်လောက်တဲ့ မေတ္တာရှင်ကြီးများ ဖြစ်နေကြပြီလား။ မေးပါအုံး၊ တွေးပါအုံး၊ ဖြေပါအုံး။
အဲဒီလောက်ထိ မေတ္တာမထားနိုင် မပွားနိုင်သေးတာကတော့ လောလောဆယ် သေချာပါတယ်နော်။ အဲဒါဆိုတော့ မေတ္တာထားနိုင်လောက်တဲ့ သူကို ရှာကြည့်တော့ တွေ့ပါပြီ သူပဲ။ သူဆိုတာ တခြားသူမဟုတ်ပါဘူး။ မိမိရဲ့ စိတ်နဲ့ကိုယ်လေ။ လောကကြီးမှာ အချစ်ဆုံးကို ရှာကြည့် ဘယ်သူလဲ။ မိမိနဲ့ တူတဲ့ ချစ်ခြင်းမေတ္တာ မရှိဘူးလို့ ဆိုကြတယ် မဟုတ်လား။ ကမ္ဘာမီးလောင် သားတောင် ချနင်း ဆိုတာတွေကလည်း အကုန်လုံး မဟုတ်သည့်တိုင် တစိတ်တပိုင်းတော့ ရှိနေကြတာပဲ မဟုတ်လား။
ကိုယ့်ထက် ပိုပြီး ချစ်ရမယ့် သူ မရှိတာကတော့ သေချာပါတယ်နော်။
အဲဒါဆိုတော့ ဘယ်သူ့ကို မေတ္တာအရှိဆုံးလဲ။ ကိုယ့်ကိုယ်ကို မေတ္တာအရှိဆုံးပေါ့။ တချို့ပြောတာတွေ ကြားဖူးပါတယ်။ မိဘတွေကို အချစ်ဆုံး၊ ကိုယ့်ဇနီးခင်ပွန်းကို အချစ်ဆုံးတဲ့။ ဟုတ် မဟုတ် မိမိကို မိမိ သေချာမေးကြည့်ရင် အဖြေထွက်လာပါလိမ့်မယ်။

အစဉ် မှတ်ဖို့ ပွားများစို့
မေတ္တာပို့ဖို့၊ ပွားများဖို့ ဒီအစီအစဉ်လေးကိုတော့ မှတ်ထားရင် ကောင်းမယ်ထင်တယ်။
၁။ မိမိကိုယ်အား၊ သက်သေထား၊ ပွားများ ရှေးဦးစွာ။
၂။ ကြည်ညိုလေးမြတ်၊ ချစ်ခင်အပ်၊ ပွားလတ်ဒုတိယာ။
၃။ မုန်း ချစ် မဟူ၊ လယ် လျစ် လျူ၊ ပွားမူ တတိယာ။
၎။ မုန်းသူ ရှိက၊ စတုတ္ထ၊ ပွားရ အေးမေတ္တာ။
၅။ ရန်သူကိုကား၊ နောက်ဆုံးထား၊ ရှုပွားရမည်သာ။

ဒီကဗျာလေးက မေတ္တာပို့ အစီစဉ်လေးပါ။ မိမိကိုယ်ကို အရင်မေတ္တာပို့၊ ပြီးရင် မိဘ၊ ဆရာ၊ ညီအကို မောင်နှမ၊ ဆွေမျိုးသားချင်းစတဲ့ ခင်မင်ရင်းနှီးသူ မှန်သမျှ ပို့ပေါ့။ ပြီးရင်တော့ သိဖူး ကျွမ်းဖူးတဲ့သူ၊ မသိ မကျွမ်းသေးတဲ့သူတွေကို မေတ္တာပို့ပေါ့။ ပြီးရင် ကိုယ်နဲ့ မတည့်တဲ့ သူ၊ ကြည့်မရတဲ့ သူတွေကို မေတ္တာပို့ပေါ့။
ဒီနေရာမှာ စဉ်းစားစရာက မတည့်တဲ့သူ ဆိုမှ ဘယ်လိုလုပ် မေတ္တာပို့နိုင်ပါ့မလဲ ဆိုတာပါပဲ။ ဒါပေမယ့် ရှေ့က အစဉ်တွေမှာ မေတ္တာက အရင်းခံထားတော့ အဆင်ပြေပြေ ပို့နိုင်ပါလိမ့်မယ်။ လုပ်သာ ကြည့်ပါ။ နောက်ဆုံး ရန်သူ။ ရန်သူဆိုတာက ကိုယ့် အကျိုးစီးပွားကို ဖျက်လိုဖျက်ဆီး လုပ်တဲ့သူ။ မိမိကိုယ်ကို မကောင်းကြံတဲ့သူ၊ ပြောတဲ့သူ။ အဲဒီသူတွေကို ပို့ပေါ့။ မဖြစ်နိုင်ဘူးဆိုတာတော့ မရှိပါဘူး။ မေတ္တာပို့ရင်း၊ ပွားများရင်းနဲ့ အဆင်ပြေသွားပါလိမ့်မယ်။
ရှေဦးအစ မေတ္တာမပွားရ
ဒီလိုဆိုပြန်တော့ မေတ္တာအရင် မပို့သင့်တဲ့သူ၊ မပွားသင့်တဲ့သူ၊ ဘယ်တော့မှ မေတ္တာမပို့ရတော့မယ့်သူတွေကိုလည်း မှတ်ထားသင့်တယ်လေ။ တော်ကြာ မေတ္တာ ပို့/ပွားပါတယ်ဆိုမှ ဒေါသတွေ ဖြစ်နေရင် မကောင်းဘူးလေ။
ပြီးတော့ ကိုယ်ပို့တဲ့ မေတ္တာက ရောက်မှန်း ရမှန်း မသိရင်လည်း မကောင်းပြန်ဘူးလေ။

မုန်းသူ စင်စစ်၊ အလွန်ချစ်၊ မချစ်မမုန်းသူ။
ရန်သူထည့်ကာ၊ လေးယောက်မှာ၊ စ.စွာ မပွားဟူ။
လိင်မတူကား၊ သီးပိုင်းခြား၊ မပွားရသည့်သူ။
သေသူမှန်က၊ ဘယ်တော့မှ၊ ပွားရ မဖြစ်သူ။
အဓိပ္ပါယ်တွေက ရှင်းပါတယ်နော်။

မေတ္တာအကျိုး ဆယ့်တစ်မျိုး

မေတ္တာအကျိုး ဆယ့်တစ်မျိုးလို့ တိုက်ရိုက်လာတယ်။ သွယ်ဝိုက် အကျိုးပေးတာတွေကလည်း အများကြီး ရှိဦးမှာပါ။ မှတ်ကြည့်ပါဦး။

အိပ်လည်း ချမ်းသာ၊ နိုးချမ်းသာ၊ ကောင်းရာ အိပ်စက်သည်။
လူရော နတ်ပါ၊ ချစ်ခင်တာ၊ စောင့်ရာ နတ်တို့သည်။
လက်နက် ဆိပ်မီး၊ မဖျက်ဆီး၊ အပြီး စိတ်တည်ကြည်။
မျက်နှာ ကြည်လေ၊ မတွေဝေ၊ အသေကောင်းလှသည်။
ဗြဟ္မာ့ဘုံးလား၊ ဆယ့်တစ်ပါး၊ ကျိုးများ မေတ္တာရည်။

မေတ္တာတွေ ပေးကြမယ်

မေတ္တာဆိုတာက အမှန်တကယ့်တော့ ကမ္မဋ္ဌာန်း(၄၀)တရားထဲမှာ ပါ ပါတယ်။ အရမ်းကို လေးနက်ပြီး အဓိပ္ပါယ် ရှိပါတယ်။ မေတ္တာက ဘယ်လောက်ပေးပေး ကုန်သွားတယ်လို့ မရှိပါဘူး။ မေတ္တာတွေ ပေးလေ။ ပိုပြီးတော့ များလာလေပါပဲ။
မိဘနဲ့သားသမီး၊ ဆရာနဲ့တပည့်၊ ဇနီးနဲ့ခင်ပွန်း၊ ဘုန်းကြီးနဲ့ဒကာ၊ အလုပ်ရှင်နဲ့ အလုပ်သမား၊ တဦးတဦး ငြိမ်းချမ်းကြည်လင်စွာ လက်တွဲဖို့၊ အိမ်နီးချင်းတွေ အဆင်ပြေကြစေဖို့၊ မတူလူမျိုး မခွဲခြားဖို့၊ တစ်နိုင်ငံနဲ့တစ်နိုင်ငံ အဆင်ပြေပြေ ပေါင်းသင်းဆက်ဆံနိုင်ဖို့၊ ကမ္ဘာကြီးငြိမ်းချမ်းစေဖို့ မေတ္တာတွေ ပေးကြမယ်လေ။
မောင်ပညာ (မန်းတက္ကသိုလ်)

No comments:

Post a Comment

Myanmar Student Monks Organization in Thailand. Powered by Blogger.